Германия Россия ваколатхоналарини ёпмоқчи
ХДУ депутати Россия дипломатларини мамлакатдан чиқариб юборишни талаб қилди.
Германияда Россиянинг дипломатик ва маданий фаолиятига нисбатан кескин чоралар кўрилиши кераклиги айтилмоқда. Христиан-демократик иттифоқ (ХДУ) депутати Родерик Кизветтер Берлиндаги “Россия уйи” ҳамда Россиянинг бошқа дипломатик ва маданий ваколатхоналарини ёпишни таклиф қилди. Бу ҳақда Ҳанделсблатт нашри хабар берди.
Депутатнинг фикрича, Москва томонидан кучайиб бораётган киберҳужумлар ва диверсия ҳаракатлари фонида Германия ўз хавфсизлигини янада қатъийроқ ҳимоя қилиши лозим. Шу сабабли у Германияда қолаётган россиялик дипломат ва махсус хизматлар ходимларини мамлакатдан чиқариб юборишни зарур, деб ҳисоблайди.
“Биз қолган барча агент ва дипломатларни чиқариб юборишимиз керак”, — деди Кизветтер.
Мазкур баёнот Германия-Россия муносабатларида янги босқични бошлаб бериши мумкин. Расмийлар бу таклиф юзасидан ҳали расман муносабат билдиришмаган.
