Покистонда 100 дан ортиқ маҳбус қочиб кетди
Зилзила фонида 200 дан ортиқ маҳбус қочишга уринган.
Покистоннинг Карачи шаҳрида содир бўлган кучли зилзила оқибатида юзага келган фавқулодда вазият қамоқхонадаги тартибсизликларга сабаб бўлди. Маълум қилинишича, зилзила вақтида эвакуация чоралари кўрилган маҳалда 100 дан ортиқ маҳбус қочиб кетган.
Хабарларга кўра, зилзила ортидан хавфсизлик сабабли маҳбуслар вақтинча камераларидан олиб чиқилган, айнан шу пайтда юзага келган отишма натижасида камида бир киши ҳалок бўлган.
Полиция хабарига кўра, Синд вилоятида жами 216 маҳбус қочишга уринган. Уларнинг 78 нафари ушланган, қолганлари қидирувда. Шунингдек, отишма давомида бир маҳбус ўлдирилган, уч нафар хавфсизлик ходими яраланган.
