Хитой халқаро саҳнада АҚШни ортда қолдирмоқда
Трампнинг бож сиёсати Вашингтон обрўсига зарба берди.
АҚШ президенти Доналд Трампнинг сиёсий қайтиши ва импорт божларини жорий қилиши оқибатида дунё етакчи давлатларида Қўшма Штатларга нисбатан муносабат салбий тус олди. Айниқса, Хитойга бўлган ижобий қарашлар сони сўнгги беш йилликда энг юқори даражага кўтарилган. Бу ҳақда Axios портали хабар берди.
Сўнгги бир ярим йиллик кузатувларга кўра, Трамп сайловда ғалаба қозонганидан сўнг Қўшма Штатларга бўлган ишонч бир муддат ортган бўлсада, унинг расмий инаугурациясидан кейин бу рейтинг тез суръатда пасайишни бошлаган.
Май ойига келиб АҚШ рейтинги салбий даражага етди. Бу ҳолат Вашингтон ва Пекин ўртасида божхона тарифларини вақтинча бекор қилиш ҳамда музокаралар ўтказиш бўйича эришилган келишув туфайли бир муддат барқарорлашди. Бироқ Трампнинг Хитойни келишув шартларини бузганликда айблаши яна обрўга салбий таъсир кўрсатди.
Айни вақтда Хитойга нисбатан халқаро муносабат изчил яхшиланмоқда. 2024 йил июль ойидан бери бу тенденция давом этмоқда: 30 май ҳолатига кўра, Хитой рейтинги 8,8 баллга етган бўлса, АҚШ рейтинги 1,5 балл билан анча орқада қолмоқда.
