Буюк Британияда маҳаллий аҳоли сони кескин камаймоқда

 

Буюк Британияда оқ танли британияликларнинг (ота-онаси ҳам ушбу мамлакатда туғилган маҳаллий аҳоли) улуши тарихда илк бор озчиликка айланиши мумкин. Бу ҳақда The Daily Telegraph нашри хабар бермоқда.

 

Букингем университети олимлари, сиёсатшунос ва иммиграция бўйича мутахассис профессор Метт Гудвин бошчилигидаги тадқиқот гуруҳи, Британия аҳолисининг демографик таркиби юзасидан Миллий статистика хизмати (ОНС) расмий маълумотларига асосланган кенг кўламли таҳлил ўтказди. Унда туғилиш, ўлим ва миграция кўрсаткичлари асосида 21-аср охиригача демографик ўзгаришлар прогноз қилинган.

 

Тадқиқот натижаларига кўра, 2050 йилга бориб оқ британияликларнинг улуши 73 фоиздан 57 фоизгача камаяди. 2063 йилга келиб эса ушбу кўрсаткич 50 фоиздан пастга тушади, бу эса уларни мамлакатдаги озчилик гуруҳига айлантиради. Аср охирига бориб, оқ британияликлар улуши 33.7 фоизгача тушиши мумкин.

 

Тадқиқот шунингдек, иммиграция ва муҳожирлар авлодлари сонининг жадал ўсишини ҳам қайд этмоқда. 2049 йилга бориб Буюк Британияда чет элда туғилган ёки камида битта ота-онаси муҳожир бўлган аҳоли улуши 33.5 фоизга етиши, 2100 йилга келиб эса бу кўрсаткич 60 фоизни ташкил этиши кутилмоқда.

 

Шунингдек, мусулмон аҳолининг ўсиш тенденцияси ҳам ажратиб кўрсатилган. 2024 йилдаги 7 фоизлик кўрсаткич 2049 йилга келиб 11.2 фоизга, аср охирига бориб эса 19.2 фоизгача кўтарилиши мумкин.

 

Профессор Гудвин бундай демографик ўзгаришлар Буюк Британия учун муҳим синов бўлишини таъкидлади: “Тадқиқотимиз мамлакатимизнинг бу миқёсдаги ўзгаришларга мослаша олиши ва уларни самарали бошқариш салоҳияти борасида жиддий саволларни юзага чиқаради”.

 

2023 йилда Буюк Британияга соф миграция оқими 860 минг кишига етган, 2024 йилда бу кўрсаткич 431 мингтага тушган бўлсада, ҳали ҳам 2010 йиллар ўртасидаги йиллик ўртача кўрсаткич (244 минг) дан анча юқорилигича қолмоқда.