Ветнамда “икки бола” сиёсати бекор қилинди

 

Ветнам ҳукумати мамлакатда туғилиш даражаси пасайиб бораётгани сабабли оилаларга нисбатан қўлланилган “икки бола” сиёсатини расман бекор қилди.

 

Янги сиёсатга кўра, эндиликда Ветнамлик эр-хотинлар нечта фарзанд кўришни ўзлари мустақил ҳал қилиш ҳуқуқига эга бўлди. Илгари эса ҳукумат оилаларни максимал икки бола билан чеклаб, бу тартибга амал қилмаганларга, айниқса коммунистик партия аъзоларига нисбатан интизомий чоралар қўллаган.

 

Чеклов дастлаб 1988 йилда жорий қилинган эди. Ўша пайтда туғилиш даражаси ҳар бир аёлга тўртдан ортиқ болани ташкил этган. Бугунга келиб бу кўрсаткич 1,91 гача тушиб кетди — бу эса мамлакатнинг иқтисодий ўсиш истиқболлари ва ишчи кучи захирасига таҳдид солмоқда.

 

Мутахассислар Ветнамни қариб бораётган аҳоли ва паст туғилиш кўрсаткичи фонида демографик инқироз кутаётганини таъкидлашмоқда. Ҳукуматнинг бу қарори аҳоли сонини барқарорлаштириш ва иқтисодий фаолликни сақлаб қолишга қаратилган муҳим қадам сифатида баҳоланмоқда.