Японияда барчага мос келувчи сунъий қон яратилди
Қон хона ҳароратида икки йилгача сақланиши мумкин.
Японияда олимлар инсон ҳаётини сақлаб қолишда инқилобий ёндашув намоён этиб, ҳар қандай қон гуруҳи учун мос келувчи сунъий қон ишлаб чиқишга муваффақ бўлишди.
Сунъий қон муддати ўтган донор қонидан олинган гемоглобин асосида тайёрланган. У вируслардан холи, чунки гемоглобин махсус ҳимоя қобиғи билан ўралган ва антигенлардан холи, бу эса уни исталган беморга қуйиш имконини беради.
Клиник синовлар 2022 йилда бошланган бўлиб, ҳозиргача ҳеч қандай ножўя таъсир қайд этилмаган.
Сунъий қоннинг яна бир устунлиги – хона ҳароратида икки йилгача сақланиши мумкин, бу эса уни фавқулодда ҳолатларда қўллаш учун айни муддао қилади.
2030 йилга келиб, ушбу сунъий қоннинг оммавий ишлаб чиқарилиши ва тиббиёт амалиётида қўлланилиши кутилмоқда.
Бу кашфиёт – шошилинч операциялар, фалокатлар давридаги қон танқислиги ва ноёб қон гуруҳлари муаммосини ҳал этишда катта имкониятлар очади.
