Ҳиндистонда байрам фожиа билан якун топди
Бангалорда стадиондаги тиқилинчда 11 киши ҳалок бўлди.
Ҳиндистоннинг жанубий қисмидаги Бангалор шаҳрида "Royal Challengers Bengaluru" крикет жамоасини қарши олиш маросими фожиа билан якунланди. Чиннасвами стадиони олдида юзага келган тиқилинч оқибатида камида 11 киши ҳалок бўлди, ўнлаб фуқаролар турли даражада тан жароҳатлари олди.
Хабарларга кўра, минглаб крикет ишқибозлари Ҳиндистон Премер-лигасида 18 йиллик танаффусдан сўнг илк бор ғолибликни қўлга киритган севимли жамоаларини тантанали кутиб олиш учун стадион атрофига йиғилишган. Керала штати крикет ассоциацияси томонидан ташкил этилган байрам тадбири иштирокчилари сони кутилганидан анча ортиб кетган.
Ижтимоий тармоқларда тарқалган видеоларда оломонда ваҳима бошланган лаҳзалар, ҳушини йўқотган кишиларни олиб кетаётган полиция ходимлари ва фавқулодда эвакуация жараёнлари акс этган.
Афсуски, қурбонлар орасида бир нафар бола ҳам бўлгани айтилмоқда. Айрим жароҳатланганларнинг аҳволи оғир экани маълум қилинган. Вазият устидан назорат ўрнатиш мақсадида полиция куч ишлатишга мажбур бўлди.
Ҳозирча маҳаллий ҳокимият томонидан ҳалок бўлганлар ёки жароҳатланганлар бўйича расмий баёнот берилгани йўқ.
