Трамп АҚШ Таълим вазирлигини тугатмоқчи
Таълим сиёсати штатларга топширилиши мумкин.
АҚШ президенти Доналд Трамп маъмурияти мамлакат Таълим вазирлигини тугатиш учун Олий суддан рухсат сўраб ариза тақдим этди.
Ушбу ташаббус амалга ошса, АҚШдаги таълим сиёсати бўйича асосий ваколатлар штатлар ва маҳаллий бошқарувларга ўтиши мумкин. Ҳозирда Таълим департаменти 100 мингдан ортиқ давлат ва 34 мингга яқин хусусий мактабларнинг фаолиятини назорат қилади.
Шунга қарамай, ушбу мактабларнинг молиявий таъминоти асосан маҳаллий ва штат даражасида ҳал этилади — давлат мактаблари учун ажратиладиган маблағларнинг 85 фоизидан ортиғи федерал ҳукуматдан эмас, балки жойлардаги ҳокимиятлардан келади.
Трампнинг бу ташаббуси унинг федерал ҳукумат ҳажмини қисқартириш ва уни қайта ташкил этиш бўйича олиб бораётган кенг қамровли сиёсатининг бир қисми сифатида қаралмоқда.
