АҚШда чақалоқлар номига сармоя ҳисоблари очилади

 

АҚШ президенти Доналд Трамп янги федерал дастурни эълон қилди. Унга кўра, 2025 йилдан бошлаб туғиладиган ҳар бир америкалик чақалоқ номига ҳукумат томонидан молиялаштириладиган бошланғич капитали 1000 АҚШ доллари бўлган инвестиция ҳисобварағи очилади. Ушбу таклиф етакчи бизнес вакиллари томонидан кенг қўллаб-қувватланди.

 

Маълумотларга кўра, Трамп Оқ уйда Uber, Goldman Sachs ва Dell Technologies каби йирик компаниялар раҳбарлари иштирокидаги давра суҳбатида “Трамп ҳисоблари” деб номланган янги ташаббусни тақдим этган. Ушбу ҳисобварақлар қимматли қоғозлар бозори билан боғлиқ бўлиб, солиқ тўловлари кечиктирилган инвестицияларни ўз ичига олади.

 

Дастур 2024 йил 31 декабрдан кейин ва 2029 йил 1 январгача туғилган чақалоқларни қамраб олади. Ҳар бир бола номига очиладиган ҳисобварақ федерал ҳукумат томонидан бир марталик 1000 долларлик бадал билан тўлдирилади. Бундан ташқари, бу ҳисобга йилига 5000 долларгача шахсий маблағ киритиш имконияти ҳам яратилади. Ҳисоблар васийлар назорати остида бўлади.

 

Доналд Трамп бу ташаббусни “оилаларни қўллаб-қувватлаш ва келажак авлод иқтисодий имкониятларини кенгайтириш” деб баҳолади.

 

Бундай дастурлар бошқа мамлакатларда ҳам учраган. Масалан, Буюк Британияда 2002–2011 йилларда давлат томонидан молиялаштирилган болалар ишонч фонди фаолият юритган. Шунингдек, Цингапурда болалар учун махсус жамғарма ҳисобварақлари билан боғлиқ давлат дастури мавжуд.