Ҳиндистонда қишлоқ хўжалиги 10 йилда 40 фоизга ўсди
Бу ҳақда мамлакат қишлоқ хўжалиги вазири баёнот берди.
Ҳиндистон сўнгги 10 йил ичида қишлоқ хўжалиги маҳсулотларини ишлаб чиқаришни 40 фоизга оширишга эришди. Бу ҳақда мамлакат қишлоқ хўжалиги вазири Шивраж Сингҳ Чоуҳан оммавий ахборот воситаларига баёнот берди.
Вазирнинг сўзларига кўра, Ҳиндистон бугунги кунда ўзининг дон маҳсулотларига бўлган эҳтиёжини тўлиқ қоплабгина қолмай, уларни бошқа мамлакатларга ҳам экспорт қилмоқда. “Омборларимиз дон билан тўла, ҳатто Покистон билан можаролар келиб чиқса ҳам, бизда хавотирга ўрин йўқ,” — деди у.
Шивраж Сингҳ Чоуҳан озиқ-овқат хавфсизлигини таъминлаш, аҳолининг эҳтиёжини қондириш ва экспорт салоҳиятини ошириш устида ишлаётганини таъкидлади. У бу борадаги натижаларни ҳукуматнинг самарали сиёсати билан боғлади.
Вазир, шунингдек, фермерларнинг даромадини ошириш, уларни қўллаб-қувватлаш ва замонавий технологияларни татбиқ этиш орқали Ҳиндистон қишлоқ хўжалиги янада юксалишига ишонч билдирди.
