Россиянинг ҳарбий қудрати НАТОни хавотирга солмоқда
Россия 5 йил ичида ҳужумга тайёр бўлиши мумкин.
Россия ҳарбий салоҳиятини кескин оширмоқда ва беш йил ичида НАТО давлатларига қарши куч ишлатиш даражасига етиши мумкин. Бу ҳақда НАТО бош котиби Марк Рутте 9 июнь куни Лондондаги Chatham House институтида қилган нутқида маълум қилди.
Руттенинг сўзларига кўра, Россия ҳарбий саноатини фаоллаштирган, ва айни дамда Хитой, Шимолий Корея ҳамда Эрон билан стратегик ҳамкорликни кучайтирган. Унга кўра, “Путиннинг уруш машинаси” тўхтамаяпти, балки тобора кучаймоқда.
“Россия Хитой технологиялари орқали қудратини тикламоқда. У биз ўйлаганимиздан тезроқ ва кўпроқ қурол ишлаб чиқармоқда. Масалан, фақат ўқ-дорилар ишлаб чиқаришда Россия уч ойда НАТО давлатлари бир йилда ишлаб чиқарган ҳажмни қоплайди”, – деди Рутте.
НАТО бош котиби шунингдек, Россиянинг 2024 йил давомида 1500 та танк, 3000 та зирҳли техника ва 200 та “Искандар” ракетасини ишлаб чиқариши кутилаётганини қайд этди. У, Россиянинг янги авлод ракеталари товуш тезлигидан бир неча баробар юқори ҳаракатланаётганини, бу эса Европа пойтахтларини бир неча дақиқада нишонга олиш имконини беришини таъкидлади.
“Энди Шарқ ҳам, Ғарб ҳам йўқ – фақат НАТО бор. Биз алданмаслигимиз керак: хавф яқин”, – деди Марк Рутте.
