Хитой қариялар парваришида роботлардан фойдаланмоқчи

 

Хитой ҳукумати қарияларни парвариш қилиш тизимини замонавий технологиялар билан такомиллаштириш мақсадида роботлардан фойдаланишни назарда тутувчи пилот дастурини бошлади. Бу ҳақда South China Morning Post нашри саноат ва ахборотлаштириш вазирлиги ҳамда фуқаролик маъмурияти вазирлигининг қўшма баёнотига таяниб хабар берди.

 

Дастур технологиялар ёрдамида қарияларга ғамхўрликни қандай енгиллаштириш, оилаларнинг вазифаларини камайтириш, парвариш ходимлари танқислигини қоплаш ва инфратузилмани ривожлантириш имкониятларини синовдан ўтказишни мақсад қилган. У уч йўналишни қамраб олади: уй шароитида, жамиятларда ва ихтисослашган муассасаларда технологик ёрдамни ташкил қилиш.

 

Роботлар соғлигида чекловлари бўлган одамларга кундалик ҳаётда кўмаклашиш, эмоционал қўллаб-қувватлаш, “ақлли” уй тизимларини жорий этиш ва когнитив муаммоларга эга шахслар билан ишлашда фойдали бўлиши кутилмоқда.

 

Дастурга қизиқиш билдирган компаниялар аллақачон робот ишлаб чиқаришни йўлга қўйган. Иштирокчилар камида 200 та роботни уй шароитида ёки 20 та муассаса ва жамоада ечимлар билан синовдан ўтказиши шарт. Шунингдек, улар ушбу йўналишда миллий стандартлар ва баҳолаш мезонларини ишлаб чиқишда ҳам иштирок этади.

 

Мазкур ташаббус Хитойда кучайиб бораётган демографик босим фонида бошланмоқда. 2024 йил охирига келиб мамлакатда 60 ёшдан ошганлар сони 300 миллиондан ошган, 2035 йилга бориб бу кўрсаткич 400 миллиондан ортиши мумкин. Ушбу ҳолатга узоқ йиллар амал қилинган “бир оила — бир бола” сиёсати ва умр кўриш давомийлигининг ортиши сабаб бўлмоқда.