Жанубий Корея самолёти Аляскада ҳалокатга учради
Бортдаги икки нафар учувчи омон қолган.
Жанубий Корея ҳаво кучларига тегишли F-16D Fighting Falcon ҳарбий самолёти АҚШнинг Аляска штатида жойлашган Eielson ҳарбий-ҳаво базасида учишга ҳаракат қилаётган вақтда ҳалокатга учради. Бахтли тасодиф билан, бортдаги икки нафар учувчи ўз вақтида катапультация қилган ва енгил куйиш ҳамда жароҳатлар билан омон қолган.
Ҳодиса сешанба куни соат 16:00 атрофида юз берган. Самолётнинг бир қисми ёниб кетган бўлиб, у учиш-қўниш йўлаги ёнидаги майсали майдонга қулаган. Фавқулодда хизматлар зудлик билан воқеа жойига етиб келган.
Жароҳатланган икки учувчи яқин атрофдаги Fort Wainwrightdagi Bassett армиявий касалхонасига етказилган. Улар ҳозирда даволанмоқда ва дам олмоқда.
Жанубий Корея ушбу ҳодисани тергов қилиш учун авария терговчилари ва таъмирлаш гуруҳини АҚШга юборади. Мазкур машқлар Red Flag номли қўшма ҳарбий ўқув машғулотларининг бир қисми сифатида ўтказилаётган эди.
