Лос-Анжелес марказида комендантлик соати жорий этилди
Қарор юзага келган норозилик намойишларини тўхтатишга қаратилган.
Лос-Анжелес шаҳрида юзага келган норозилик намойишлари ортидан шаҳар марказида комендантлик соати эълон қилинди. Мер Карен Бассга кўра, вандализм ва талончиликнинг олдини олиш мақсадида 2,5 квадрат километр ҳудудга кириш 20:00 дан 06:00 гача ёпилди. Бу чеклов маҳаллий аҳолига, журналистларга, фавқулодда хизматларга ва уй-жойсизларга татбиқ этилмайди.
Полиция департаменти комендантлик соатига қарамай, одамлар тўпланишда давом этаётганини маълум қилди ва оммавий ҳибсга олишлар бошланиши ҳақида огоҳлантирди. 9 июнь тонгида 23 та савдо дўкони талон-тарож қилинган, 500 дан ортиқ одам қўлга олинган.
AFP хабарига кўра, сўнгги беш кун ичида Трамп маъмуриятининг иммиграция сиёсатига қарши норозилар бир нечта кўчаларни эгаллаб олган. Айримлар полиция билан тўқнашган, машиналарга ўт қўйган ва дўкон ойналарини синдирган.
Мер Бассинг айтишича, зўравонлик лавҳалари бутун шаҳарда инқироз ҳолати юз бераётгандек тасаввур уйғотмоқда, аммо бу ҳақиқат эмас. У, шунингдек, президент Доналд Трампни ICE рейдларини тўхтатишга чақириб, бу масалада бевосита боғланишга ҳаракат қилаётганини билдирди.
