Telegram серверлари ФСБга алоқадор тизимлар томонидан бошқарилмоқда
Бу Telegram'нинг махфийлиги ҳақида жиддий саволлар туғдирмоқда.
“Важные истории” нашри Telegram мессенжери сервер инфратузилмаси бўйича ўтказган суриштирувда платформа фойдаланаётган серверлар ва инфратузилма Россия махфий хизматларига яқин шахслар томонидан бошқарилаётганини аниқлади.
Маълумотларга кўра, Telegram орқали ўтадиган IP-манзилларнинг асосий қисми Global Network Management Inc компаниясига тегишли бўлиб, унинг эгаси Владимир Веденеэв ҳисобланади. 2018 йилги суд ҳужжатларига кўра, у Telegram Corp’нинг молиявий директори бўлган.
Telegram 2020 йилдан бошлаб ушбу компания хизматларидан фойдаланишни бошлаган. Аввал бу IP-манзиллар Санкт-Петербургдаги GlobalNet компаниясига тегишли бўлган. Кейинчалик GlobalNet ва DATAIX тармоқлари бирлашган ва ҳозирда улар ФСБ, Ички ишлар вазирлиги ҳамда Мудофаа вазирлигига хизмат кўрсатувчи ёпиқ марказлар билан боғлиқ.
Шунингдек, "Электронтелеком" компанияси ҳам Telegram'га IP-манзилларни тақдим этади. 2024 йилгача унинг эгаси ҳам Веденеэв бўлган, ҳозир эса уни унинг қариндошлари бошқаради. Суриштирув Telegram'нинг махфийлиги ҳақида жиддий саволлар туғдирмоқда.
