6 йил давом этган ҳаводаги фирибгарлик фош бўлди

 

АҚШнинг Жанубий Флорида штатида яшовчи 35 ёшли Тайрон Александр ўзини авиакомпания ходими сифатида таништириб, 6 йил давомида самолётларда бепул парвозлар қилганликда айбланмоқда. Унга нисбатан фирибгарлик ва хавфсизлик зонасига ноқонуний кириш бўйича жиноят иши очилган. Александр 30 йилгача озодликдан маҳрум этилиши мумкин.

 

Хабарларга кўра, 2018 йилдан 2024 йилгача у еттита йирик АҚШ авиакомпаниясининг тизимига кириб, ўзини стюард, баъзида ҳатто учувчи сифатида кўрсатган. Шу тарзда у 120 дан ортиқ рейсда текинга парвоз қилган.

 

Тергов маълумотларига кўра, Александр сохта кўкрак нишонлари рақамлари, уйдирма ишга қабул қилинган саналар ва бошқа ёлғон маълумотлар орқали авиакомпанияларнинг ички бронь тизимларига кирган. У махсус ходимлар учун мўлжалланган имкониятлардан фойдаланган, бироқ йиллар давомида бу фаолият деярли фош этилмаган.

 

Ушбу ҳолат авиация тизимларининг ахборот хавфсизлиги ва ички назорат механизмлари борасида кескин саволлар туғдирди. Фирибгарнинг қандай аниқлангани ҳозирча очиқланмаган.

 

Мазкур воқеа Стивен Спилбергнинг “Иложи бўлса, мени тут” (Catch Me If You Can) номли машҳур фильмидаги сюжетни эслатади. Унда бош қаҳрамон Френк Абагнейл ҳам 1960 йилларда ўзини учувчи сифатида кўрсатиб, бир неча йил давомида фирибгарлик қилган эди. Афтидан, бу фильм Александрга ҳам “илҳом” бўлган кўринади.