АҚШда НАСАнинг ўнлаб дастурлари тўхтатилади

 

АҚШ президенти Доналд Трамп маъмурияти Миллий аэронавтика ва фазони тадқиқ қилиш бошқармаси — НАСА учун ажратиладиган маблағларни кескин қисқартиришни режалаштирмоқда. Блоомберг хабарига кўра, Оқ уй НАСА илмий дастурлари учун ажратилган бюджетни 50 фоизга — 3,9 миллиард долларгача қисқартиришни таклиф қилган.

 

Мазкур таклиф федерал харажатларни камайтириш стратегиясининг бир қисми сифатида тақдим этилган бўлиб, мутахассислар буни агентлик тарихидаги энг паст молиялаштириш даражаларидан бири сифатида баҳоламоқда.

 

Нашр манбаларининг қайд этишича, ушбу кескин қадам натижасида НАСАънинг 40 дан ортиқ илмий миссияси ва тадқиқот лойиҳаси ёпилиши мумкин. Бу эса фазони ўрганишдаги илмий изланишлар, иқлим кузатувлари ва технологик инновацияларни жиддий орқага суриши эҳтимолини кучайтиради.

 

Бундан ташқари, Оқ уй НАСАъни барқарор раҳбариятсиз ва Хитой ҳамда бошқа глобал рақобатчилар билан самарали рақобат юритиш учун зарур стратегик йўналишларсиз қолдирганликда танқид қилинмоқда.

 

НАСА келажакдаги миссиялар, жумладан Ой ва Марсга парвозлар, сунъий йўлдош тармоқлари ва Ер иқлимини кузатиш лойиҳалари учун барибир глобал миқёсда муҳим аҳамиятга эга бўлиб қолмоқда. Аммо бюджет қисқариши ушбу режаларга жиддий тўсиқлар келтириши мумкин.