Аргентинанинг собиқ президенти коррупция билан 6 йилга қамалди
Унга умрбод давлат хизматида ишлаш тақиқланди.
Аргентинанинг собиқ президенти Кристина Киршнер коррупция жинояти бўйича 6 йил озодликдан маҳрум этилди. Бу ҳақда TN телеканали хабар берди.
Маълум қилинишича, мамлакат Олий суди илгари чиқарилган ҳукмни ўз кучида қолдирган. Суд ҳайъати бир овоздан Киршнерни жиноят гуруҳини ташкил этиш ва давлат маблағларини ўзлаштириш мақсадида фирибгарлик асосидаги бошқарувда айбдор деб топган.
Ушбу маблағлар Санта-Крус ҳудудидаги миллий инфратузилма лойиҳалари учун ажратилган бўлган. Суд, шунингдек, Киршнер 2003 йилдан 2015 йилгача тадбиркор Лазаро Баэс манфаатлари йўлида фаолият олиб борганини аниқлади. Лойиҳаларнинг нархлари сунъий оширилган, кўплаб ишлар эса умуман бажарилмаган.
Ҳукмга кўра, Киршнерга умрбод давлат хизматида ишлаш тақиқланди. Судланувчи уй қамоғига ўтиш учун ариза бериш ҳуқуқига эга.
