Дунёдаги энг фаол вулқонлардан бири уйғонди
Килауэа 100 метр баландликда лава сочмоқда.
Гавайи оролларидаги энг фаол вулқонлардан бири — Килауэа — яна уйғонди. Бу ҳақда Тҳе Индепендент нашри хабар берди. Ушбу ҳодиса 2024 йил декабридан бери рўй бераётган 25-ҳолати сифатида қайд этилди.
Сўнгги маълумотларга кўра, лава оқими тахминан 100 метр баландликка кўтарилмоқда. Мутахассислар ҳозирча аҳоли учун бевосита хавф йўқлигини билдирмоқда, бироқ жараён доимий мониторинг остида сақланмоқда.
Эслатиб ўтамиз, Килауэа вулқони Гавайи архипелагининг энг йирик ороли — Катта оролда жойлашган бўлиб, баландлиги 1250 метрга тенг. У дунёдаги энг фаол вулқонлардан бири саналади. Килауэанинг отилишлари баъзида бир неча кун, баъзида эса ойлар давом этади. Хусусан, 2018 йилда бўлган кучли отилиш 700 дан ортиқ уйларнинг вайрон бўлишига олиб келган эди.
