Жанубий Африкада кучли қор ва ёмғир ёғиши кузатилмоқда
Оқибатда 49 киши ҳалок бўлган.
Жанубий Африканинг Шарқий Кейп провинциясида кучли ёмғир ва қор ёғиши оқибатида сув тошқинлари юзага келиб, камида 49 киши ҳалок бўлди. Ал-Жазира хабарига кўра, фожиа асосан тоғли ҳудудларда рўй берган бўлиб, кўплаб йўллар ёпилиб, электр таъминоти узилган.
Шарқий Кейп губернатори Лубабало Оскар Мабуяне матбуот анжуманида мактаб автобуси сувга оқиб кетгани натижасида олти ўқувчи ҳалок бўлгани, тўрт нафари бедарак йўқолгани ва уч нафари қутқариб қолинганини маълум қилди. У, шунингдек, кўчки ва йўллардаги тирбандликлар қутқарув ишларини жиддий қийинлаштираётганини айтди.
Табиий офат натижасида мамлакат жануби ва шарқида юз минглаб уйлар электр энергиясиз қолди. Расмий маълумотларга кўра, тахминан 500 киши вақтинчалик бошпаналарга кўчирилган. Қутқарув ишлари ҳозирда давом этмоқда.
