Хитой дунёдаги энг катта амфибия самолётини ишлаб чиқаради
Хитой ҳавода ҳам, сувда ҳам ҳаракатлана оладиган улкан самолётни тақдим этди.
Хитой авиация саноатида муҳим бурилиш юз берди. Мамлакат дунёдаги энг йирик амфибия самолёти AG600 ни оммавий ишлаб чиқаришга рухсат олди. 11 июнь куни ишлаб чиқариш учун барча зарур лицензиялар қўлга киритилганини Хитойнинг Авиация Саноати Корпорацияси (AVIC) расман тасдиқлади.
AG600 ўз ҳажми билан кўпчиликни ҳайратга солмоқда: самолётнинг узунлиги — 38,9 метр, қанотлар кенглиги — 38,8 метр, баландлиги эса 11,7 метрни ташкил қилади. Бу ўлчамлар уни стандарт тор-фюзеляжли йўловчи самолётлардан ҳам йирикроқ қилади. У максимал 60 тоннагача юк кўтариб, 4500 километргача масофани босиб ўтишга қодир.
Мазкур амфибия самолёти асосан ўрмон ёнғинларига қарши курашишда қўлланилади — у бир сафарда 12 тонна сув олиб, олов ўчириш ишларини бажариши мумкин. Шунингдек, у денгизда қутқарув, кузатув, йўловчи ва юк ташиш, ҳатто геологик разведка вазифалари учун ҳам мослаштирилган.
AG600 нафақат Хитой, балки бутун Осиё авиацияси учун технологик ютуқ саналади. Унинг кўп функцияли дизайни келажакдаги глобал экологик ва хавфсизлик муаммоларига самарали ечим бўлиши мумкин.
