Афинада вертолёт денгизга қулаб тушди
Фожиа оқибатида ҳалок бўлганлар йўқ.
Юнонистон пойтахти Афинанинг Вулягмени курорт ҳудуди яқинида вертолёт денгизга қулаб тушди. Skai телеканалининг хабар беришича, ҳодиса вақтида бортда бўлган беш кишининг барчаси тирик қолган, тўрт нафар йўловчи енгил тан жароҳатлари олган.
Вертолёт Вулягмени кўрфазида турган яхтадан ҳавога кўтарилганидан сўнг қисқа фурсатда денгизга қулаб тушган. Маълум қилинишича, у Миконос оролига йўл олган эди.
Ҳодисадан сўнг қутқарув ишлари дарҳол бошланган, шишириладиган қайиқлар ёрдамида бортдагилар хавфсиз тарзда сувдан чиқариб олинган. Вертолётнинг аниқ модели ҳозирча эълон қилинмаган. Авария юзасидан текширув ишларини Вулягмени порт хизмати олиб бормоқда.
