Исроил ҳужумларида Эроннинг 14 нафар олими ҳалок бўлди
Олимлар автомобилларга ўрнатилган портловчи қурилмалар орқали ўлдирилган.
Исроилнинг Эрон ҳудудида амалга оширган ҳаво зарбалари ва махсус операциялари оқибатида камида 14 нафар эронлик физик олими ҳалок бўлди. Айрим олимлар автомобилларига ўрнатилган портловчи қурилмалар орқали нишонга олинган.
Эроннинг расмий “Nour News” агентлиги ҳалок бўлганлар сонини 6 нафар деб кўрсатган. Улар орасида Абдулҳамид Минучеҳр, Аҳмадризо Зулфиқорий, Фаридун Аббосий каби ядро соҳасининг етакчи мутахассислари бор. Маълум бўлишича, улар 2020 йилда ўлдирилган “Эрон ядровий дастурининг асосчиси” Муҳсин Фахризоданинг шогирдлари бўлган.
Исроил бу ҳужумларни “Исёнкор шер” номли ҳарбий операция доирасида амалга оширган. Эрон эса бунга жавобан “Ҳақиқий ваъда 3” номли жавоб операциясини бошлаб, Исроилга юзлаб ракеталар учирган. Можаро тобора кескин тус олмоқда.
