Туркияда иккита ҳаво шари қулаб тушди
Ҳаво шарининг қулашига кучли шамол сабаб бўлган.
Туркиянинг машҳур туристик минтақаси Кападокияда икки ҳаво шари қулаб тушди. Аксарай вилоятида юз берган ушбу ҳодисада бир киши ҳалок бўлди, яна 12 киши тан жароҳати олган.
Маҳаллий оммавий ахборот воситалари хабарларига кўра, ҳалок бўлган шахс 37 ёшли шар учувчиси бўлиб, у шар қўнаётганда сават остида қолиб кетган. Жабрланганлар орасида Индонезиялик сайёҳлар бўлган.
Воқеа жойига зудлик билан полиция, қутқарувчилар ва ўт ўчириш бригадалари етиб келган. Ярадорлар яқин касалхонага етказилган, уларнинг аҳволи енгил деб баҳоланмоқда.
Расмийларнинг маълумотларига кўра, ҳаво шарларининг парвози тонгги соат 5:00 атрофида, машҳур Ихлара водийсидан бошланган. Тахминан 7:00 да эса кучли ва кескин шамол бошланиб, иккала шарни бошқарувдан чиқарган. Қанча баландликдан қулагани ҳақида ҳозирча расмий маълумот берилмаган.
