Исроил Эрон Қуролли Кучлар раҳбарини ўлдирди

Исроил ҳарбийларига кўра, Эрон Қуролли Кучлар Бош штабининг янги раҳбари генерал Али Шадмони Теҳронда амалга оширилган аниқлаштирилган зарба натижасида ҳалок бўлган. У лавозимга атиги бир неча кун олдин, аввалги раҳбар Муҳаммад Богерий номаълум ҳужумда ҳалок бўлганидан кейин тайинланган эди.

 

Али Шадмони узоқ йиллар давомида Эроннинг ҳарбий тузилмалари, жумладан, “Исломий инқилоб посбонлари корпуси” билан яқин ҳамкорликда фаолият юритган. У Эрон Олий раҳбари Оятуллоҳ Али Хоманаийнинг ҳарбий масалалар бўйича энг ишончли маслаҳатчиларидан бири бўлган.

 

Зарба Исроил махсус кучлари ва разведка хизматлари томонидан режалаштирилган бўлиши тахмин қилинмоқда. Исроил томони ушбу операцияни Эроннинг минтақадаги ҳарбий фаоллигига ва Ливан ҳамда Сурия орқали қурол етказиб беришга қарши чора сифатида баҳоламоқда.

 

Эрон ҳукумати воқеани ҳали расман тасдиқламаган бўлсада, Теҳрондаги хавфсизлик даражаси оширилган, ҳарбий объектлар атрофида кучайтирилган назорат ўрнатилган. Бу ҳолат икки давлат ўртасидаги аллақачон кескин бўлган зиддиятларнинг янада кучайишига олиб келиши мумкин.