Океан тубида ноёб “сув ости мўъжизаси” аниқланди
Мўъжиза 700 метр чуқурликда топилган.
Олимлар Жанубий Атлантика океанидаги Жанубий Сандвич ороллари яқинида ноёб сув ости экотизимини кашф этдилар. 700 метр чуқурликда олиб борилган 35 кунлик экспедиция давомида илгари номаълум бўлган ҳайвонот ва ўсимликлар дунёси қайд этилди.
Мазкур ҳудудда гидротермал тешиклар, иссиқ сув мўрилари, қизил маржонлар, паразит балиқлар, ноёб салянгозлар ва бошқа экзотик жонзотлар аниқланди. Тадқиқотчилар бу муҳитни ўзгача, ранг-баранг ва экологик жиҳатдан ўта бой деб таърифламоқда.
Кашфиётнинг энг диққатга сазовор жиҳати — илгари фақат назарий жиҳатдан мавжуд деб ҳисобланган «Акаротаксис» турига мансуб балиқларнинг илк бор суратга олиниши бўлди. Бу балиқлар мутлақо қоронғу ва юқори босимли муҳитда яшайди.
Мутахассислар бу сув ости ҳудудини Ер юзидаги энг ажралган ва биологик хилма-хиллиги юқори жойлардан бири сифатида тасвирламоқда. Кашфиёт келажакда океан ҳаёти ва сайёрамиздаги ҳаёт турлари ҳақида чуқурроқ тасаввурга эга бўлишга ёрдам беради.
