Роналду Трампга имзоли футболка совға қилди
Афсонавий футболчи АҚШ президентини “тинчлик тарафдори” дея таъкидлади.
Беш карра “Олтин тўп” соҳиби, португалиялик афсонавий футболчи Криштиану Роналду АҚШ президенти Доналд Трампга ўз имзоси туширилган миллий терма жамоа футболкасини совға қилди.
Футболкада “Тинчлик тарафдори бўлган Президент Доналд Трампга” деган сўзлар ёзилган. Совға Трампга Европа Кенгаши президенти Антонио Коста орқали тантанали равишда топширилган.
Роналду ҳозирда 40 ёшда. У беш карра UEFA Чемпионлар Лигаси ғолиби, Европа чемпиони, икки карра Миллатлар лигаси ғолиби ҳамда бир қатор йирик турнирларнинг энг яхши тўпурари сифатида тарихга кирган. Шунингдек, у расмий ўйинларда 900 та гол урган биринчи футболчидир.
