Россияда эркак ақл тишини олдиргандан сўнг вафот этди
Шифокорга нисбатан жиноий иш қўзғатилди.
Россиянинг Перм шаҳрида 35 ёшли Евгений Кунавин оддий тиббий амалиёт — ақл тишини олдириш жараёнидан сўнг оғир асоратлар туфайли вафот этди. Операциядан кейин инфекция ривожланиб, сепсисга олиб келган.
У бир ярим ҳафта реанимацияда сунъий нафас олиш аппаратига уланган ҳолда даволанган, бироқ комага тушиб ҳаётдан кўз юмган. Марҳумдан рафиқаси ва икки нафар фарзанди етим қолди.
Мазкур ҳолат бўйича Россия Жиноят кодексининг 109-моддаси 2-қисми (“Эҳтиётсизлик оқибатида ўлимга сабаб бўлиш”) асосида жиноят иши қўзғатилди. Терговчилар тиббий хатолик юзасидан текширув ишларини олиб бормоқда.
Ҳозирча шифокорнинг исми ошкор этилмаган, бироқ тиббий амалиётда эҳтиётсизлик ёки нотўғри муолажа ҳолатлари юз берган-бермаганини аниқлаш мақсадида экспертиза тайинланган.
