Намибияда SIM-картасиз ишлайдиган телефон яратилди

Намибиялик ёш ихтирочи Симон Петрус SIM-карта ва эфир вақти (airtime) талаб қилмайдиган мобил телефонни яратди. Мазкур телефон анъанавий уяли алоқа тармоқларидан фойдаланмасдан, радиочастоталар орқали бевосита қўнғироқларни амалга ошириш имконини беради. Қурилма мустақил алоқа тизими сифатида ишлайди ва ҳар қандай тармоқ, трафик ёки SIM-картага эҳтиёж сезмайди.

 

Симон Петрус бу лойиҳани талабалик даврида, қайта ишланган эски электрон қурилмалар – уй телефони, телевизор ва икки томонлама радиолардан фойдаланиб яратган. У телефонни қисқа тўлқинли частоталарда ишлайдиган алоқа қурилмаси сифатида ишлаб чиққан.

 

Телефоннинг яна бир жиҳати – у қўшимча функцияларни ҳам ўз ичига олади. Қурилмага кичик телевизор, LED чироқ, вентилятор ва USB қувватлаш портлари ўрнатилган. Уларнинг барчаси битта оддий радиаторли тизим орқали қувватланади.

 

Симон Петрус ихтиросини илк бор мактаб илмий ярмаркасида тақдим этиб, кенг жамоатчилик эътиборини қозонган ва мукофот соҳиби бўлган. Шундан сўнг у маҳаллий ҳамда халқаро оммавий ахборот воситаларининг ҳам диққат марказига тушган.

 

Бироқ Петрус ўрта мактабдан кейин олий таълимга киришда қийинчиликларга дуч келган. У 2023 йилда электроника муҳандислиги бўйича диплом олганига қарамай, ҳозирда ишсиз экани айтилмоқда. Унинг телефон ихтироси ҳали тижоратлаштирилмаган ва бозорга чиқарилмаган.