Хакерлар Эроннинг йирик криптовалюта биржасига ҳужум қилишди
Хакерлар махфий маълумотларни ошкор қилмоқчи.
Исроилни қўллаб-қувватловчи "Гонжешке Даранде" (ёки “Йиртқич чумчуқ”) номли хакерлар гуруҳи Эроннинг энг йирик криптовалюта биржаси — Nobitex га қарши киберҳужум уюштирганини эълон қилди. Бу ҳақда Исроилнинг Ynet News нашри хабар берди.
Хакерлар баёнотида таъкидланишича, ҳужум Эроннинг етакчи банкларидан бири бузилганидан бир кун ўтиб амалга оширилган. Гуруҳ Nobitex'ни террористик фаолиятни молиялаштиришда ва рақамли валюталар ёрдамида халқаро санкцияларни четлаб ўтишда айблаган.
Шунингдек, хакерлар биржанинг барча ички маълумотларини 24 соат ичида ошкор қилиш билан таҳдид қилган. Уларнинг даъволарига кўра, бу маълумотлар тизимнинг молиявий операциялари ва фойдаланувчилар билан боғлиқ махфий тафсилотларни ўз ичига олади.
Ҳозирча Nobitex расмий жавоб бермаган, аммо Эрон ахборот хавфсизлиги органлари ҳолатни ўрганмоқда.
