Еврокомиссия Россия газидан бутунлай воз кечмоқчи
Ҳозирги мавжуд импорт шартномаси 2028 йилгача амал қилади.
Еврокомиссия 2028 йилга бориб Россиядан газ импортини тўлиқ тўхтатишни режалаштирмоқда. Ушбу режага кўра, барча Европа Иттифоқига аъзо давлатлар Россия гази харидини буткул тўхтатади.
Бу ташаббус ЕИнинг энергетик мустақиллигини ошириш, шунингдек, геосиёсий хавфсизликни таъминлаш мақсадида илгари сурилган. Комиссиянинг фикрича, Россиядан энергияга боғлиқлик Европанинг сиёсий ва иқтисодий хавфсизлигига таҳдид солмоқда.
Режада муқобил энергия манбаларини ривожлантириш, суюқ газ (LNG) импортини кенгайтириш ва қайта тикланувчи энергия турларига ўтишни жадаллаштириш назарда тутилган.
Ҳозирча баъзи аъзо давлатлар бу режанинг амалга оширилиш муддати ва иқтисодий оқибатлари борасида эҳтиёткорлик билан муносабат билдирмоқда. Шу билан бирга, Еврокомиссия режани босқичма-босқич амалга оширишга ва зарурий инфратузилмани яратишга ваъда бермоқда.
