Бишкекнинг деярли барча туманлари электрсиз қолди
Подстанциялардан бирида авария юз бергани айтилмоқда.
Қирғизистон пойтахти Бишкекда кенг кўламли электр узилиши содир бўлди. Бу ҳақда ТАСС ахборот агентлиги мамлакат Энергетика вазирлигига таяниб хабар берди.
Вазирлик вакилининг айтишича, дастлабки тахминларга кўра, подстанциялардан бирида авария юз берган. Мутахассислар айни дамда электр таъминотининг узилишига нима сабаб бўлганини аниқлаш устида ишламоқда.
Бишкек билан бирга унга туташ жойлашган Чуй вилоятининг айрим ҳудудлари ҳам электр энергиясидан узилган. Аҳоли муаммодан жиддий зиён кўрмаган бўлсада, шаҳар ҳаётида узилишлар юзага келган.
Вазирлик электр таъминотини тиклаш бўйича ишлар олиб борилаётганини маълум қилди ва фуқаролардан сабр-тоқат билан кутишни сўради.
