Камбоджа Таиланд маҳсулотлари ва сериалларини тақиқлади
Бу чоралар икки давлат ўртасидаги чегаравий можаролар кучайгани ортидан кўрилган.
Камбоджа Таиланд мева-сабзавотларини, шунингдек сериал ва фильмларини импорт қилишни тақиқлади. Ташқи сиёсий зиддиятлар, хусусан, баҳсли ҳудудда юз берган отишмада камбоджалик аскарлар ҳалок бўлгани вазиятни кескинлаштирди. Жавобан, Камбоджа Таиланд маҳсулотларини божхона назоратидан ўтказишни тўхтатди, виза муддатларини қисқартирди ва Таиланд интернет хизматларини чеклади.
Камбоджанинг собиқ раҳбари Хун Сен томонидан эълон қилинган сиёсий ультиматум ортидан 17 июндан бошлаб Таиланднинг озиқ-овқат маҳсулотларига тақиқ кучга кирди. 18 июнь куни ўн минглаб камбоджаликлар расмий ҳукумат позициясини қўллаб-қувватлаш учун кўчаларга чиқди.
Ушбу можаронинг илдизи 1953 йилга – Франциянинг минтақани тарк этган даврига бориб тақалади. 2003 йилда Ангкор Ват ибодатхонаси атрофида юзага келган тарихий баҳслар ва элчихонага уюштирилган ҳужумлар ҳам муносабатларни ёмонлаштирган эди.
Айни вақтда Камбоджа можарони Халқаро суд орқали ҳал қилиш тарафдори бўлса, Таиланд бу масалани фақат бевосита музокаралар билан ечмоқчи.
