Павел Дуров Трамп сиёсатини танқид қилди
Уни ижтимоий тармоқлардан блоклашни хавфли деб атади.
Telegram мессенжери асосчиси Павел Дуров АҚШ президенти Доналд Трампнинг сиёсатини танқид қилиб, у қилган ишларнинг кўп қисмини маъқулламаслигини билдирди. Бу ҳақда у Франциянинг Le Point газетасига берган интервьюсида айтиб ўтди.
“Мен Трампнинг барча ҳаракатларини қўллаб-қувватламайман, лекин уни ижтимоий тармоқлардан блоклаш — бу катта хато, ҳаттоки жуда хавфли ҳодиса деб ҳисоблайман. Бу ҳолат муҳим бир претседент яратди”, — деди Дуров.
У 2021 йилда Трампнинг ижтимоий тармоқларда оммавий равишда блокланишини эслатиб ўтди. Дуровга кўра, ўша вақтда жамоатчилик бунга рухсат бергани туфайли, эндиликда ҳар қандай инсон бундай хавф остида қолиши мумкин.
“Агар бир мамлакатнинг президентини интернетдан ўчириб ташлаш мумкин бўлса, оддий одамлар ундан ҳам кўпроқ ҳимоясиз қолади”, — дея қўшимча қилди у.
Дуровнинг бу баёноти ижтимоий тармоқлар ва сўз эркинлиги мавзусида давом этаётган глобал мунозараларда яна бир бор муҳим нуқтага эътибор қаратди.
