Путин Зеленский билан учрашишга тайёрлигини билдирди
Россия раҳбари Украина президенти билан музокарага очиқлигини билдирди.
Россия президенти Владимир Путин Украина президенти Владимир Зеленский билан учрашув ўтказишга тайёрлигини билдирди. Бу ҳақда у Санкт-Петербург халқаро иқтисодий форуми доирасида халқаро ахборот агентликлари раҳбарлари билан бўлган учрашувда баён қилди, деб хабар беради РБК манбаси.
Путиннинг айтишича, у Зеленский билан учрашувни истисно қилмайди, бироқ Киевда бундай учрашув якунлари бўйича битим имзолаш ваколати бор-йўқлиги масаласида шубҳалари борлигини таъкидлади.
“Агар бу учрашув шунчаки ўтириш ёки гапни чўзиш учун эмас, балки муҳокамаларга нуқта қўйишнинг якуний босқичи бўлса — у ҳолда мумкин”, — деди Путин.
Шунингдек, Россия раҳбари Москва ва Киев музокарачилари ўртасидаги алоқалар давом этаётганини маълум қилди. Навбатдаги учрашув 22 июндан кейин бўлиши мумкин.
Путин, шунингдек, Туркия президенти Ражаб Тоййиб Эрдоған ва ташқи ишлар вазири Ҳакан Фиданнинг Украина билан музокараларда кўрсатаётган воситачилик саъй-ҳаракатларини юқори баҳолаб, миннатдорчилик билдирди.
