Ҳаво ифлосланиши саратондан хавфлироқ бўлиши мумкин

 

Буюк Британияда ҳавонинг ифлосланиши нафақат экологик, балки жиддий соғлиқни сақлаш ва иқтисодий инқирозга айланган. Қироллик шифокорлар коллежи томонидан ўтказилган тадқиқотга кўра, ҳар ҳафта 500 дан ортиқ фуқаролар заҳарли ҳаво оқибатида ҳаётдан кўз юмади. Йиллик ҳисобда бу рақам 30 мингдан ортади.

 

The Guardian нашрининг ёзишича, ушбу фожиали статистика атроф-муҳитдаги ифлосланиш, меҳнат унумдорлигининг пасайиши, сурункали касалликлар ва соғлиқни тиклаш учун қилинаётган улкан харажатларга боғлиқ. Фақат ҳаво ифлосланишининг ўзи ҳафтасига мамлакат бюджетига 500 миллион фунт стерлингдан ортиқ зарар етказмоқда.

 

Тадқиқотлар шуни кўрсатадики, ҳаводаги зарарли моддаларнинг ҳатто энг паст миқдори ҳам инсон организмига – айниқса юрак-қон томир, нафас йўллари, руҳий ҳолат ва мия фаолиятига салбий таъсир қилади. Заҳарли ҳаво британияликларнинг ўртача умрини 1,8 йилга қисқартириши мумкин.

 

Экспертларнинг огоҳлантиришича, ҳавонинг ифлосланиши дунёдаги энг хавфли ўлим сабабларидан бирига айланиб бормоқда — саратон ва чекишдан кейин учинчи ўринда туради.

 

Шу сабабли, тиббиёт мутахассислари ҳукуматни бу муаммони миллий соғлиқни сақлаш инқирози сифатида тан олишга ва қатъий чоралар кўришга чақирмоқда. Расмий рақамларга кўра, ҳар йили мамлакат иқтисодиёти атроф-муҳит сабабли 27 миллиард фунт стерлинг зарар кўради.

 

Британия ҳукумати жавобан 575 миллион фунт ажратилганини билдирган ва бу йўналишда комплекс чора-тадбирлар ишлаб чиқилаётганини маълум қилган. Бироқ экспертлар бу етарли эмаслигини ва муаммо тубдан ҳал қилинмагунча инсон саломатлигига хавф сақланишини таъкидламоқда.