Эрдоған Эрон ташқи ишлар вазири билан учрашди
Туркия АҚШ–Эрон ўртасидаги музокараларда воситачи бўлишга тайёр эканини билдирди.
Туркия президенти Ражаб Тоййиб Эрдоған Истанбулда ўтказилган Ислом ҳамкорлик ташкилоти Ташқи ишлар вазирлари йиғилиши доирасида Эрон ТИВ раҳбари Аббос Арақчини қабул қилди.
Учрашувда Исроил–Эрон зиддияти, минтақавий ва глобал муаммолар муҳокама қилинди. Эрдоған минтақа янги урушга бардош бера олмаслигини айтиб, Исроилни ҳужумларни тўхтатишга чақирди.
Туркия президенти ядровий можарони фақат музокаралар йўли билан ҳал қилиш мумкинлигини таъкидлади ва Туркия АҚШ–Эрон ўртасидаги музокараларда воситачи бўлишга тайёр эканини билдирди.
Учрашув чоғида икки томон савдо алоқаларини кенгайтириш, энергетика соҳасида ҳамкорликни кучайтириш ва минтақадаги инсонпарварлик инқирозларига биргаликда жавоб бериш масалалари ҳам муҳокама қилинди.
