Эронда интернет муаммоси давом этмоқда
Айни пайтда Эроннинг кўплаб шаҳарларида алоқа ва ахборот оқими чекланган.
Яқин Шарқда кескинлик кучайган бир пайтда Эрон 60 соатдан ортиқ вақт давомида интернетсиз қолмоқда. Бу ҳолат фуқаролар ва ташкилотлар ўртасидаги мулоқотни жиддий чеклаб қўйди.
Бу ҳақда интернет эркинлиги, цензура ва технологик хавфсизликни кузатувчи халқаро мониторинг ташкилоти — NetBlocks маълум қилди. Уларнинг қайд этишича, мамлакатда интернетга кириш деярли тўлиқ тўхтаган.
Маҳаллий манбалар хабарига кўра, интернетнинг узилиши ижтимоий тармоқларда ахборот тарқалишини тўхтатиш ва норозилик кайфиятининг олдини олишга қаратилган бўлиши мумкин. Айни пайтда Эроннинг кўплаб шаҳарларида алоқа ва ахборот оқими чекланган.
Эслатиб ўтамиз, Эрон ҳукумати интернетга кириш чекловларини мамлакатда жорий этилган фавқулодда ҳолат билан асослаган. Расмийлар буни миллий хавфсизликни таъминлаш учун зарур чоралар сифатида кўрсатмоқда.
