Охирги кунларда қанча эронлик ядро олими ҳалок бўлди?
Бу ҳақда Исроил маҳаллий телеканаллари хабар берган.
2025 йил 13 июндан бошлаб Исроил Эрон ҳудудида тўғридан-тўғри ҳарбий зарбаларни бошлади. Исроилнинг Чаннел 12 телеканали хабарига кўра, бу ҳужумлар натижасида 17 нафар етакчи эронлик ядро олими ҳалок бўлган.
Ҳалок бўлган олимларнинг аксарияти махсус ҳимояланган “хавфсиз уйлар”да нишонга олинган. Шу вақт ичида Эрон ҳукумати ҳам ўнлаб жосуслар ва агентларни қўлга олганини эълон қилган.
Айни дамда Исроил ҳарбий-ҳаво кучлари Эрон жануби-ғарбидаги ҳарбий инфратузилмаларга зарба бермоқда. Шунингдек, Шероз, Қум ва Исфаҳон каби йирик шаҳарлардаги ҳарбий ва ядровий объектлар ҳам ҳужумга учраган.
Қумдаги зарбалар оқибатида икки киши, жумладан, 16 ёшли ўсмир ҳалок бўлган, тўрт киши яраланган. Исфаҳонда эса портлашлар ва ҳаво мудофаа тизимларининг фаоллашгани қайд этилган. Мазкур ҳудудда Эроннинг энг йирик ядровий тадқиқот мажмуаси жойлашган.
