БАА, Қатар, Қувайт ҳаво ҳудудини ёпди

 

Яқин Шарқдаги геосиёсий вазият тобора кескинлашар экан, Бирлашган Араб Амирликлари (БАА) Қатардан сўнг ўз ҳаво ҳудудини фуқаро авиацияси учун вақтинча ёпди. Бу қарор Эроннинг АҚШ ҳарбий объектларига жавоб зарбалари бериши мумкинлиги фонида қабул қилинди.

 

Эрон расмийлари АҚШнинг ядровий объектларга қилган сўнгги ҳужумлари учун “тўғридан-тўғри жавоб” берилишини билдирар экан, асосий нишон сифатида Қатардаги Ал-Удейд ҳарбий авиабазасини тилга олишди. Бу ерда 10 мингдан ортиқ АҚШ ҳарбий хизматчилари, стратегик авиация ва муҳим техникалар жойлаштирилган. Шунга қарамай, БАА ҳаво ҳудудининг ёпилиши минтақадаги бошқа АҚШ объектларининг, хусусан, Дубай ва Абу-Даби яқинидаги Ал-Дҳафра авиабазаси ҳамда Жебел Али портининг ҳам хавф остида эканлигини кўрсатмоқда.

 

БААдаги россиялик сайёҳлар бу ҳолатга турлича муносабат билдирмоқда. Баъзилари портлашлардан чўчиб, бошпана қидирмоқда. Бошқалари эса вазиятга бефарқ кўриниб, ҳатто ракета ҳужумларини видеога олишга тайёр. “Бу бир умрда бир марта бўладиган воқеа. Дўстларим билан бу лаҳзани суратга оламиз,” — дейди Дубайда дам олаётган россиялик сайёҳ Сергей.

 

Мутахассислар хавфсизликни сақлаш, одамлар гавжум жойлардан узоқлашиш ва расмий ахборот манбаларини кузатиб боришни тавсия қилмоқда. БАА осмонининг ёпилиши парвозлар кечикиши ва йўналишларнинг ўзгаришига олиб келиши мумкинлиги сабабли саёҳатчиларга авиакомпаниялари билан алоқада бўлиш тавсия этилади.

 

Эслатиб ўтамиз, бир неча кун аввал Эрон ракеталари Европанинг Кипр ороли устидан учиб ўтган ва кўплаб сайёҳларни қўрқитган эди. Ижтимоий тармоқларда бассейн бўйида дам олаётган туристлар ракета учишини кузатган видеолар тез тарқалди. "Тунги осмон қўрқинчли томошага айланди", — деб ёзди улардан бири.