Эрон ядровий иншоотларида вайронагарчиликлар аниқланган
Эрон иншоотларида портлаш оқибатлари жиддий бўлиши мумкин.
Халқаро атом энергияси агентлиги (IAEA) Эроннинг Фордо, Натанз ва Исфаҳондаги ядровий объектларига АҚШ томонидан уюштирилган ҳаво ҳужумларидан сўнг жиддий шикастлар қайд этилганини маълум қилди. Агентлик бош директори Рафаэл Гросси бу ҳақда IAEA Бошқарув кенгашининг фавқулодда йиғилишида баёнот берди.
Гроссининг сўзларига кўра, Фордодаги уран бойитиш марказида ер сатҳида ўқ-дорилар тушган чуқурликлар — воронкалар — аниқ кўзга ташланмоқда. Бу эса АҚШнинг ҳаво зарбалари ҳақидаги баёнотларига мос тушади.
“Аммо ҳозирча ер ости инфратузилмасига етказилган аниқ зарарни баҳолашнинг имкони йўқ”, — деди Гросси.
Унинг таъкидлашича, Фордодаги сантрифужлар портлашларга жуда сезгир, ва портлаш кучи ядро иншоотларига “жуда катта зарар етказган бўлиши” эҳтимолини кучайтиради. Шунга қарамай, Эрон расмийлари IAEA'га берган маълумотга кўра, периметрдан ташқарида радиация сатҳининг ошиши қайд этилмаган.
Бош директор, шунингдек, Натанз ва Исфаҳондаги иншоотларда ҳам вайронагарчиликлар аниқланганини тасдиқлади.
Исфаҳонда уранни қайта ишлаш билан боғлиқ бинолар, шунингдек бойитилган ёқилғини сақлаш учун ишлатилган ер ости туннеллар зарарланган. Натанздаги уранни бойитиш маркази ҳам нишонга олинган.
IAEA Эрондаги вазиятни кузатишда давом этмоқда ва Теҳронни ҳар қандай ҳодиса ёки фавқулодда вазиятлар юзасидан агентлик марказий аппаратини тезкор хабардор қилишга чақирди.
Маълумот учун, Исроил 13 июнга ўтар кечаси Эронга қарши ҳарбий операция бошлаган эди. Бир кундан кам фурсатда Эрон ҳам жавоб ҳужумини уюштирди. АҚШ эса бу можарога 22 июнга ўтар кечаси кириб, Эроннинг учта асосий ядровий объектига — Фордо, Натанз ва Исфаҳонга зарба берди. Можаро давом этмоқда, томонлар йўқотишлар ҳақида маълумот бермоқда.
