Нью-Йоркда урушга қарши норозилик намойишлари авж олди

 

АҚШнинг Эрон ядровий иншоотларига уюштирган ҳаво ҳужумидан сўнг, Нью-Йорк шаҳрида минглаб одамлар урушга қарши норозилик намойишларига чиқди. Фуқаролик жамияти вакиллари Яқин Шарқда кескинлик кучаяётганидан хавотир билдирмоқда.

 

Хабарларга кўра, норозилик ҳаракатларининг эпицентри Манхеттеннинг марказий қисми — Таймс майдонида жойлашган. Ушбу майдон АҚШ маданиятининг тимсоли сифатида кенг танилган. Намойишлар нафақат Нью-Йоркда, балки АҚШнинг бошқа кўплаб йирик шаҳарларида ҳам бўлиб ўтди. Улар президент Доналд Трамп маъмуриятининг ташқи сиёсатидан норозилик сифатида ўтказилган.

 

Телеканаллар тарқатган кадрларда юзлаб намойишчилар “Эрон урушини тўхтатинг” ва “Трамп — уруш жиноятчиси” каби шиорлар ёзилган плакатлар билан кўринади. Намойишчиларнинг аксарияти кенг кўламли ҳарбий можарога олиб келувчи эҳтимолий оқибатлардан хавотирда.

 

Эслатиб ўтамиз, 22 июнга ўтар кечаси АҚШ президенти Доналд Трамп Эроннинг Фордо, Натанз ва Исфаҳондаги учта ядро объектига қарши ҳарбий операция бошланганини эълон қилган эди. АҚШ ҳаво кучлари Б-2 Спирит бомбардимончилари орқали ер остида жойлашган Фордо уранни бойитиш марказига махсус бункерга қарши бомбалар билан зарба берди. Шу билан бирга, Америка сувости кемаларидан Исфаҳон ва Натанздаги объектларга Томаҳавк қанотли ракеталари отилди.

 

Трамп операцияни “тўлиқ муваффақият” деб атаб, асосий ядро иншоотлари “бутунлай йўқ қилинди” дея даъво қилди. Бироқ, Эрон расмиийлари бу баёнотни инкор этиб, Фордодаги завод фақат қисман зарар кўрганини ва фаолиятини давом эттираётганини маълум қилди.