Россия АҚШнинг Эрон бўйича ҳужумларини кескин қоралади
АҚШ ўз ҳукмронлигини сақлаб қолиш учун ҳар қандай жиноятга тайёр.
Россиянинг БМТдаги доимий вакили Василий Небензя АҚШни “ўзининг глобал ҳукмронлигини сақлаб қолиш” мақсадида “ҳар қандай жиноятларга” тайёрликда айблади. Бу ҳақда у Эроннинг сўрови билан чақирилган БМТ Хавфсизлик Кенгашининг фавқулодда йиғилишида баён қилди.
Ўтган ўн кун ичида Халқаро атом энергияси агентлиги (MAGATE) бош директори Рафаэл Гросси Эрон ядровий инфратузилмасига берилган зарбалар бутун минтақа ва ҳатто глобал миқёсда олдиндан айтиб бўлмайдиган оқибатларга олиб келиши мумкинлиги ҳақида огоҳлантирган эди. Шунга қарамай, Вашингтонни на радиацион оқибатлар, на минглаб тинч аҳоли ҳаёти ва соғлиғига таҳдид қизиқтирмоқда, — деди Василий Небензя.
АҚШ ўзининг глобал ғоявий ва сиёсий устунлигини сақлаб қолиш учун халқаро ҳуқуқни бузиб, исталган жиноятга қўл уришга тайёр эканлигини яна бир бор исботлади, — дея қўшимча қилди у ва Россия бу ҳужумларни “энг қатъий тарзда” қоралашини таъкидлади.
22 июнга ўтар кечаси АҚШ ҳаво кучлари Эроннинг Натанз, Фордо ва Исфаҳон шаҳарларидаги ядро объектларига кенг кўламли зарбалар берди. MAGATE зарбалар оқибатида радиация чиқиши қайд этилмаганини маълум қилди. Эрон президенти Масъуд Пезешкиан АҚШнинг бу ҳужумларига албатта жавоб бўлиши кераклигини айтди.
