Россияда хорижликлар учун ижтимоий суғурта тизими қайта кўриб чиқилмоқда
Россия чет эллик ишчиларнинг суғурта нафақасига кириш шартларини ўзгартирмоқчи.
Россия Давлат Думасида кўриб чиқилаётган янги қонун лойиҳасига кўра, Россияда меҳнат қилаётган чет эл фуқаролари фақатгина олти ойлик суғурта стажига эга бўлсаларгина касаллик таътили учун тўлов олиш ҳуқуқига эга бўладилар.
Бу ҳақда Давлат Думасининг Меҳнат, ижтимоий сиёсат ва фахрийлар ишлари бўйича қўмитаси раҳбари Ярослав Нилов маълум қилди. Унинг сўзларига кўра, ҳозирги қонунчилик барча чет эл фуқаролари ва фуқаролиги бўлмаган шахсларнинг ижтимоий суғурта тизимида қатнашишини назарда тутади. Шу билан бирга, вақтинчалик яшаш ҳуқуқига эга шахслар ва Евроосиё иқтисодий иттифоқи (ЕОИ) аъзоси бўлган давлатларнинг фуқаролари Россия фуқаролари билан тенг шартларда ижтимоий кафолатлардан фойдаланмоқда. Бу эса, ижтимоий фонд бюджетига ортиқча босим юклаётгани таъкидланди.
Янги қонун лойиҳаси ушбу тизимни оптималлаштириш, молиявий барқарорликни сақлашга қаратилган. Лойиҳага кўра, суғурта мукофотлари касаллик ҳодисаси юз беришидан камида олти ой олдин тўланган бўлиши шарт этиб белгиланмоқда.
Бироқ, оналик нафақаси учун энг кам йиллик суғурта стажи талаб этилиши ҳали ҳам сақлаб қолинади. Беларус фуқаролари ва бошқа мамлакатларнинг юқори малакали мутахассислари бу чекловлардан мустасно этилади.
