Венгрия ва Словакия Россияга қарши санкцияларга қарши чиқди
Будапешт ва Братислава ЕИнинг Россияга қарши 18-санкция пакетини қабул қилмади.
Венгрия ва Словакия Европа Иттифоқининг Россияга қарши навбатдаги — 18-санкция пакетини қабул қилишига рухсат бермади. Бу ҳақда Венгрия ташқи ишлар вазири Питер Сиярто Брюсселда бўлиб ўтган ТИВ раҳбарлари учрашувида баёнот берди.
Маълум қилинишича, Сияртонинг сўзларига кўра, агар бу санкциялар тўплами қабул қилинганида, Европа Иттифоқи мамлакатлари, жумладан Венгрия ва Словакия, Россиядан табиий газ ва арзон хом нефть харид қилиш имкониятидан маҳрум бўларди.
“Биз Словакия билан биргаликда 18-санкция пакетининг қабул қилинишини тўхтатдик. Бу мамлакатларимиз иқтисодий манфаатларига тўғри келмайди”, — деди Сиярто венгер журналистлари билан суҳбатда.
Маълумот учун, Европа Иттифоқи Россияга нисбатан қатор санкцияларни 2022 йилда Украинадаги можаро бошланганидан сўнг жорий этган. Ҳар бир янги пакет кўпроқ чекловларни ўз ичига олмоқда, аммо айрим аъзолар энергетик хавфсизлик нуқтайи назаридан санкцияларни танқид остига олишмоқда.
