Боласи мактабга бормаган мигрант оилаларни Россия депортация қилмоқчи
Давлат Думаси депутати мактабга мунтазам қатнамайдиган мигрант болалар ва уларнинг ота-оналарига нисбатан қатъий чоралар кўришни таклиф қилди.
Россия Давлат Думаси депутати Сардана Авксентьева мактабга мунтазам қатнамайдиган мигрант болалар ва уларнинг ота-оналарига нисбатан қатъий чоралар кўришни таклиф қилди. Депутат бу борадаги ташаббусини Ички ишлар вазирлигига тақдим этган.
Авксентьеванинг таъкидлашича, Россиянинг йирик шаҳарларида мигрант болаларнинг мактаб таълимидан четда қолиши жиддий муаммога айланган. Унинг сўзларига кўра, мавжуд статистикага биноан, чет эллик оилалар фарзандларининг қарийб 50 фоизи таълим тизимидан ташқарида қолмоқда.
“Москвада 80 мингдан ортиқ мигрант бола бор. Шундан атиги 25 минг нафари мактабларда ўқийди. Бу эса тизимли муаммо мавжудлигини очиқ кўрсатади”, — дейилади депутатнинг расмий мурожаатида.
Ушбу вазият Россия жамиятига интеграция жараёнларини мураккаблаштираётгани, ёпиқ этник гуруҳларнинг шаклланиши ва ноқонуний фаолият хавфини ошираётгани таъкидланди.
Ташаббусга кўра, Марказий Осиё давлатларидан келган мигрант болалар рус мактабларига мажбурий равишда қатнаши керак бўлади. Агар бу талаб доимий равишда бузилса, фақат болани эмас, балки унинг ота-онасини ҳам мамлакатдан чиқариб юбориш таклиф этилмоқда.
