MSNBC ва CNN телеканаллари “ахлат” — Трамп
АҚШ президенти 12 кунлик уруш якунида ОАВ ва Эрон ҳақида кескин баёнот билан чиқди.
АҚШ президенти Доналд Трамп Fox News телеканалига берган интервьюсида MSNBC ва CNN’ни кескин танқид қилди. У мазкур телеканалларни “ахлат” деб атар экан, уларни сохта янгиликлар тарқатишда айблади.
Трампнинг таъкидлашича, ушбу оммавий ахборот воситалари унинг АҚШ ҳарбий-ҳаво кучлари томонидан Эрон ядровий объектларига берилган зарбалар натижасида “барча иншоотлар бутунлай вайрон қилинди” деган баёнотини шубҳа остига қўйган.
“Эрон ҳеч қачон ядровий дастурини тикламайди. Мутлақо. Ҳаммаси вайрон бўлди. Б-2 учувчилари ўз миссиясини аъло даражада бажарди”, — деди Трамп.
У, шунингдек, танқидий саволлар берган журналистларни, зарба берган ҳарбийлардан узр сўрашга чақирди.
Маълумот учун, 22 июнга ўтар кечаси Трамп АҚШ ҳарбий-ҳаво кучлари Эроннинг учта ядровий объектига ҳужум қилганини билдирган эди. Унга кўра, бу иншоотлар уранни бойитиш бўйича Эроннинг асосий марказлари бўлган.
Орадан икки кун ўтиб, Трамп Эрон ва Исроил ўзаро ўт очишни тўхтатишга келишиб олганини маълум қилди. У 12 кунлик уруш тугаганини олқишлаб, “бу келишув катта муваффақият” эканини таъкидлади.
