Қирғизистонда ҳоким ва яна икки мансабдор мажлис вақтида ҳибсга олинди
Ҳоким ва қурувчилар устидан жиддий текширув ишлари олиб борилмоқда.
Қирғизистоннинг Токмок шаҳри ҳокими Мақсад Нусувалиев ҳокимлик йиғилиши давомида Миллий хавфсизлик давлат қўмитаси (ГКНБ) раҳбари Қамчибек Тошиевнинг буйруғи асосида ҳибсга олинди. Бу ҳақда “24.kg” нашри хабар бермоқда.
Шунингдек, “UMS” компанияси раҳбари ҳамда “Ал-Кадр” қурилиш фирмасининг директори ҳам қўлга олинган. Ҳозирча уларга нисбатан расмий айблов эълон қилинмаган.
Норасмий манбаларга кўра, ҳибсга олиш ҳолати Токмокдаги айрим микроҳудудларда марказий ҳокимият розилигисиз спорт мактаби ва истироҳат боғи қурилиши билан боғлиқ бўлиши мумкин.
Мақсад Нусувалиев 2023 йил март ойида Токмок шаҳри ҳокими этиб тайинланган эди. У бунгача давлат тузилмаларида фаолият юритган ва технократ раҳбар сифатида танилган. Аммо у кўпроқ жамоатчилик эътиборини можароли баёнотлари билан тортиб келган.
