Исроил энди Ливанга ҳужум қилди

Сешанба куни Ливан жанубидаги Кфар Дажжал шаҳарчасида юз берган дрон ҳужумида камида уч киши ҳалок бўлди. Ливан соғлиқни сақлаш вазирлиги маълумотига кўра, ҳужум натижасида автомобиль нишонга олинган, қурбонлар орасида Ҳизбуллоҳ билан молиявий алоқадорликда гумон қилинган эркак ва унинг икки ўғли бор.

 

Бу ҳодиса душанба куни Исроил томонидан Литани дарёсининг шимолидаги бир нечта шаҳарларга уюштирилган авиазарбалар ортидан рўй берди. Исроил ҳарбийлари бу ҳужумлар Ҳизбуллоҳга тегишли ракета учириш нуқталари ва қурол омборларига қарши қаратилганини билдирди. Аммо сешанбадаги дрон ҳужуми юзасидан изоҳ бермади.

 

Ҳизбуллоҳ ўтган ой тузилган сулҳ шартларига биноан Литани дарёсининг жанубий қисмларидан кучларини олиб чиққан. Бироқ Исроил ҳарбий амалиётларни давом эттирмоқда. Айни пайтда Ҳизбуллоҳ расмийлари Эронни қўллаб-қувватлаш ниятида эмасликларини айтмоқда. “Эрон ўзини ўзи ҳимоя қила олади”, – деган эди Ҳизбуллоҳ расмийси ўтган ҳафтада.

 

Ливан бош вазири Наваф Салам эса Доҳада Қатарнинг бош вазири билан биргаликда ўтказилган матбуот анжуманида Исроилнинг сулҳни бузаётганини кескин қоралади. “Ливан ҳудуди бўйлаб давлат ҳокимиятини тиклаш устида ишлаяпмиз. Мамлакат барқарорлиги учун Исроилнинг тўлиқ чиқиб кетиши зарур, айниқса ҳали ҳам эгаллаб турган беш ҳудуддан”, – деди у.