Исроил ва Эрон можароси тез орада қайта бошланиши мумкин
Трамп можаронинг яна қайтишини истисно этмади.
АҚШ Президенти Доналд Трамп Гаагадаги НАТО саммити якунлари бўйича ўтказилган матбуот анжуманида Исроил ҳамда Эрон ўртасидаги зиддиятнинг тез орада қайта бошланиши мумкинлигини тан олди. Бу ҳақда Oxu.Az TASS агентлигига таяниб хабар берди.
Трамп сўзларига кўра: “Улар жуда қаттиқ курашдилар. Ҳар икки давлат зиддиятдан чарчаган ва ҳозирда жанговар ҳаракатларни давом эттиришга қизиқиш билдирмаяпти. Томонлар курашни вақтинча тўхтатиб, вазиятни юмшатишга интилмоқда. Аммо, бу яна бошланиши мумкинми? Менимча, ҳа. Тез орада бошланиши мумкин”.
Бироқ, аввалроқ Трамп Исроил ва Эрон ўртасида ҳарбий ҳаракатлар қайта бошланганига ишонмаслигини ҳам билдирган: “Бу 12 кунлик уруш эди, тугади, деб ўйлаймиз. Улар яна бир-бирига ҳужум қилмайди, деб ўйламайман”.
Эслатиб ўтамиз, Исроил 13 июнь кечаси Эронга қарши операция бошлади, эртаси куни Эрон жавоб зарбаларини берди. АҚШ 22 июнь куни Эроннинг учта ядровий иншоотини нишонга олди. 23 июнь куни Эрон Қатардаги Ал‑Удейд авиабазасига ракета ҳужуми уюштирди ва 24 июнь куни Трамп томонлар можарони тўхтатишга рози бўлганини эълон қилди.
